بصى يا بنت الناس

بصي يا بنت الناس
لو سنك يتراوح من 18 لـ 25 سنه و مرتبطه ف انتي اكيد ف مرحله من المراحل دي :

- إنك ف مرحلة الحب الخفيف يدوبك قالك بحبك و لسه بتعرفوا بعض و بتشوفوا إيه الدنيا ، نصيحه استمري في المرحله دي على قد ما تقدري و متسأليش عن السبب  

- تاني مرحله بقى اللي هى الحب "الجامد" هنا بيبتدي الموضوع يتطور و يبتدي يتجرأ عليكي ، متلبسيش دي متقلعيش دي
أنا بغير عليكي ، ازاي تخرجي من غير ما تقوليلي ، شيلي صورك من ع الفيس و الواتس ، متكلميش فلان ماتتأخريش بره و إلخ إلخ ، و انتي طبعا زي الجاموسه بتقولي حاضر و نعم و يا خرااشي بيغير عليا ، يالهوووي حمش قوي .. احب اقولك اتنيلي  

- الليڤل التالت ده بقى اللي فيه البهاليز كلها
هيبتدي يقولك " انتي مراتي " ، انتي بتاعتي و بس ، و تبتدي الأباحه بقى و الكلام اللي يتفهم بمعاني مختلفه ، و الموضوع بيوصل " للعيال" كمان و بتختاروا الأسامي مع بعض ، و تتخانقوا على لون اوضة الأطفال "اللايت بينك" ولا "الأخضر البوستاج" ،
و تنامي تحلمي بالأطفال اللي بيطلعوا على علب اللبن ..و تختاروا البيت و هتقضوا شهر العسل فين ! لأ ده انتو كمان هتختاروا القاعه اللي الفرح هيتعمل فيها ..

- أما المرحله الأخير " مقابلة الوحش" ، الصخره التي تحطمت عليها آمال الكثيرين ، ف المرحله دي كلامكو بيبتدي يقل تدريجيا لحد ما يوصل ل"المفيش" !
إهمال بقى و معامله من تحت الضرس ، و لما تكلميه او تحاولي تبيني زعلانه من اهماله هيصفك بصفه من الإتنين يإما "مجنونه" أو "نكديه" و ف الحالتين انتي مش فاهمه هو بيعمل كده ليه بس غالبا يا روحي بيبقى فيه بضاعه جديده وصلت و نزل عليكي التخفيضات !
و تفضلي انتي يا عيني تعيطي ، و تكتئبي ، و وزنك يزيد ..
او يقل على حسب  

و تفضلي كده لغاية ما إصحابك يقولولك "البت عبير المعفنه هتتجوز" و تروحي انتي بقى فرح عبير و تخرجي الكبت اللي جواكي في الرقص ..
و غالبا هتلاقي واحده ست -طخينه- مركزه معاكي
حبيها هتبقى حماتك
و هتبصي تلاقي نفسك عايشه مع واحد اهبل ماتعرفيهوش فاكر انه اول واحد في حياتك مع إنه مشي مع 500 واحده قبلك !
و هتخلفي برضو ! بس مش زي العيال اللي بيطلعوا على علب اللبن ، غالبا هيبقوا مكلبظين زي ابوهم و ستهم
و هتكرهي العيشه و العيال ،
و هتتخانقي مع جوزك ليل نهار .. و العيال هيتعقدوا و نصهم هيسيبلك البيت و يمشي ..

حسيتي بالكارثه !!
اتلمي بقى ، و بلاش حب
ولا جواز
و لو حد قالك تعالي نروح فرح عبير تفي عليه.. بكررها اهوه تفي عليه ..   

الحب احقر شيء في الحياة ياما زل رجالة بشناب وياما حطم كرامة نساء
مقولة للفيلسوف هيمون غندي

شكرا لك هايدي موضوع قيم
تشكري على النصايح